Thursday, July 31, 2008

تعليقات تانى على السريع

تعليقات ده على السريع تانى ..

· انا حلمت ان الاهلى كسب الزمالك 6 – 0 امبارح ، تفتكروا دى نتيجة المتش اللى جى؟ .. على فكرة انا لا اهلاوى و لا زملكاوى بس شوفو اد ايه مواضيع الكورة دى شغلونا بيها الى حد انها وصلتلى فى حلم و انا فى .... المانيا

· الجو هنا يا ساتر يا رب ، سخونة شمس .. و بعدين ... برودة مطر .. و برق و رعد و افلام رعب كده .. بس اللى تلاحظو ان الناس بردو باردة ! .. دا ايه البرود ده

· صاحبى بيقوللى و هو زعلان : الاسبانيات مشيوا ، و صاحبى التانى بيقول و هو زعلان : الفرانساويات ماشيين ، و الايطاليات ماشيين بس كمان حبّة .. و انا باقول : اعتقد بأه احنا كمان نمشى بأه اعتقد .. علشان الوَشْ ده

· اى مشروع تخّرج فى الدنيا ليه ثلاثه مراحل : مرحلة ماحدش عارف حاجة ، و بعدين مرحلة لسّا ماحدش عارف حاجة ، و اخيرا مرحلة يا ريتنا كنّا عرفنا كده من الاول !

· اوعى يلا تفتكر يلا انها لمّا تقوللك انا زى ماما يلا ، و تخدك واحد حضن حنان الام .. انو فاهم؟ فاهم انت و لا مش فاهم؟ .. لا يا خويا .. بلا ما بلا خا .. دول عالم فى الطراوة .. و فوقوا بأه ..

· قالت لى : ضع "زيرلن" فى جملة مفيده و اعربها ... فقلت لها : و صاح قائلا : زيرلن !

.. مثال رهيب لتواتر الافكار و انتشار القلش .. كل شعب "اولم" يسأل ... ياعنى ايه زيرلن .. ترى ما هو الزيرلن .. رسالتى اليكم جميعا .. كلمة ألفناها .. و بعدين زيرلن بأه .. !!

· كان نفسى احضر اول يوم فى تنفيذ قانون المرور الجديد ، علشان اتأكد ان البلد زى ما هيا مافيهاش قانون بيتنفذ صح...

· سألت واحد قريبنا ، اسعار اللحمة وصلت كام عندكم قاللى ماعرفش اصل ماشوفتهاش من شهر .. قريبى ده متجوز قبل ما سافر ... مش متخيل شكله لمّا ارجع ..

· قاعدين كده و سمعت اتنين واحدة امريكية مع واحد المانيا بيتكلموا فى السياسة و الشرق الاوسط و الاتراك .. بركز معاهم لقيت الاتنين سكرانين طينه ، عرفت سياسة الدول دى بتتعمل فى جلسات شكلها عامل ازاى ..

· عند استخدام اللغات المفتاحية العربية تصدرت اللغة العربية القوائم المتعلقة بكلمات‏‏ "سياسة ـ اباحية ـ رياضة"‏ واحتلت فيها المركز الأول‏,‏ بينما تصدرت اللغة الفارسية القوائم المتعلقة بكلمات‏’‏ اقتصاد ـ علوم ـ دين‏’‏ واحتلت فيها المركز الأول ... من تقرير مؤسسة جوجل لاحصائيات البحث على شبكة الانترنت ...

Wednesday, July 30, 2008

أ ب ت

اعتقد اننا فى حاجة لسماع تلك الاغنية مرة اخرى



Thursday, July 24, 2008

فطاطرى الترمينى


لماذا دائما ما ينتابنا شعور بالريبة عندما نرى مصريين فى الخارج ؟

سألت هذا السؤال لنفسى بعد ان انتابنى نفس الشعور مع دخولى ذلك محل "الفطير" البسيط القريب من محطة ترمينى فى روما. و للعلم بالشيئ فإن عدد المصريين (او العرب عموما) الذى رأيته فى روما اضعاف ما رأيته فى المانيا منذ وصولى الى تلك البلاد. و كلنا نعلم بالطبع عدد المصريين الذى يحاول دائما الهرب من الواقع بالداخل الى واقع غير معلوم النتائج فى الخارج. و فى هذا الجو الاورومتوسطى الذى ينتابك و انت تتحرك فى شوارع روما ، كان من الطبيعى ان تجد مصرى يمشى بجانبك يقول :

ايوه يا خواجه ، انا جى اهوه .. حاضر بس هو فين .....

ثم يختفى الصوت فى زحمة الاحياء و السائحون مثلى...

قبل السفر ، كان دائما ما يحكى الناس عن تجاربهم الاليمة من التعامل مع المصريين بالخارج و كيفية تجنب المصريين فى التعامل كما لو ان هذا المصرى كائن غير مرغوب التعامل معه بالخارج. كما حذرنى الجميع من التعامل مع المصريين و على حد تعبير رئيس جامعتنا الذى قال لنا بالحرف فى اجتماع توديعنا :

- لو شفت امّك ماشيه فى الشارع ... دوّر وشك و امشى ...

و بالفعل فإننى قد لاحظت ذلك جليا فى تحركاتى فى اوروبا ، فقد تجد مصريا امامك فينتابك خليطا من المشاعر الغريبة. اول تلك المشاعر تكون ترحيبا "بريحة الحبايب" ، ثم يتبعه ذلك بشعور من الريبة ... تتذكر دائما مسلسلات جمعة الشوان و رأفت الهجان ... و افلام بأه بعيد عنكم و عن السامعين ..

....

حكى لى المسئول عن مكان استضافتنا فى المانيا عن حكايته مع المصريين و كيف انهم يكيدوا لبعضهم البعض ، حيث قال له صديق لبنانى انه لم يرى هذه المشاكل فى اية جالية اجنبيه بقدر ما رأى فى تعامل المصريين مع بعضهم البعض. اننى بالطبع لم اصادف و الحمد لله تلك المشاكل لان الدراسة عامة بعيدة عن مجال العمل و الالتحام الحقيقى مع الطبقات العاملة التى تأتى من مصر للبحث عن فرص عمل. و لكن الثابت امامى اننى وجدت تعاونا غير طبيعى بين الاتراك مثلا فى اوروبا ، حيث دائما ما تشعر بأنهم يفيدون بعضهم البعض بقدر الامكان ... ناهيك عن التعاون الموجود بين ابناء الجاليات الاوروبية المختلفة فى حد ذاتها.

نعود الى روما ..

دخلنا محل "الفطير" لنجد ثلاثة مصريين فى سن الاربعينات ، و كان ينتابنا شعور بالجوع الشديد. طبعا ، رحب بنا صاحب المحل و اخذ يتحدث عن مصر و جمال مصر ، و قد كان المحل مصرى الطراز تماما من حيث نوعية الكراسى السوداء الحديد "الطويلة ديه" و بالطبع نوع الطعام الذى يقدمه ... فطير.

لن انسى ابتسامة الزميلة شيماء عندما قال لها احد العاملين : اجيبلك تحبى الفطيرة ديه؟ ..

فرأيت شيماء و قد اصبحت على وشك ان تذرف دموعا مع ابتسامة ، شعرت بأنها كانت احد التائهين فى فيلم امريكا شيكا بيكا .. و قالت له : اه .. مع تنهيدة مسلسل عربى "بتاع الساعة تمانية على القناة التانية"

ثم بدأنا جميعا فى اختيار الاكل .. عندما فجأه دوى سؤال فى المكان من احد العاملين بصوت ثورى ..

انتو رأيكوا ايه فى البلد؟

"انزل يا عم بالموسيقى التصويرية بتاعت فيلم الطريق الى ايلات"

ابتسمت طبعا من ذلك التعبير الذى رأيته على وجوه الجميع ، توقف الزمن و بدى و كأن السؤال ايقظ المجموعة من لذة الفطير ، و كأن الفطير به قرش حشيش ..

لحظات صمت قليلة ...

ثم فجأه توالت الاجابات كلها فى وقت واحد ..

- الحمد لله ، كويس ياعنى اه..

- اه ياعنى مصر واحشانا بردو ..

- فيها مشاكل بس اه ياعنى اه .. فاهم؟

- نقول الحمد لله ..

ثم بدأ العامل الاخر فى السؤال بإبتسامة عريضة ..

لو عايزين اى حاجة احنا تحت امركم ياعنى ..

كلنا فى فم واحد : طبعا طبعا طبعا ، اكيد اكيد اكيد ..

و لك ان تتخيل مدى اهتزاز النبرات من ذلك الشعور الاكشن الذى وصلنا اليه و نحن نأكل الفطير اللذيذ كما اسلفت...

لحظات صمت ......

انتو جايين تبع المركز الثقافى الايطالى ؟ ..

(و بعدين بأه فى الليلة اللى مش فايته ده .. يا عم حل عن نفوخى بأه) ..

- لا احنا اصلن من المانيا بندرس ياعنى و جايين رحلة بس فى روما ..

- انتو لوحدوكو؟ مافيش حد معاكم؟

- لا و الله مافيش ... (هو شكله مستنى كلمة السر الفانلة على المنشر ، و الديك بيكاكى)

- على العموم احنا هنا بنساعد ياعنى و انتو على العين و على الراس و الله ..

- متشكرين و الله .. (يا عمّنا ، عرفنا خلاص ... فهمت انا خلاص) ..

و خرجنا من الفطاطرى المصرى كلنا فى صمت .. فى ريبة .. انه حقا شعور غريب .. كله من المسلسلات العربى اللى بيفرجونا عليها ..

عندما عدت الى غرفتى ، لم انم لاننى تذكرت ذلك المشهد الذى كان دائما ما يتخيله محمود عبد العزيز فى مسلسل رأفت الهجان .. مشهد دخول الاسرائيليون عليه و اكتشافهم امره ، و وضعه فى تلك الغرفة الحمراء ...


ممكن بالفعل ان يكون هؤلاء العاملين يريدون مساعدتنا بحكم خبرتهم فى البلد ، شعور عادى مثل اى شعور لشخصين من نفس البلد .. و لكن الثابت امامى ، تلك الريبة التى نشعر بها ، و تلك النظرات السينمائية التى ننظر بها لبعض عندما نقابل مصرى فى بلاد اوروبا...

"انزل بالموسيقى بتاعت فيلم عمارة يعقوبيان" .. فقد بدأنا فى اليوم التالى التجول فى شوارع روما ...







Sunday, July 20, 2008

Interview

The Pakistani Spectator made an interview with me about my blogging experience. I enjoyed the questions and it was nice to answer all of them :D

You can check the interview on this link :
http://www.pakspectator.com/interview-with-blogger-hussein-adel-fahmy/

I hope you can post your opinion on the interview :)
Thanks

-Hussein

Tuesday, July 15, 2008

زلزال 2008

استيقظت على خبر من موقع "مصراوى" على حدث وقوع زلزال فى مصر بقوة 6 و شوية فكة على مقياس رختر..

و اذا كان العلماء قد حذروا بأن مصر قد تدخل حزام الزلازل التى تنبع من شمال البحر المتوسط ، فإننى ارى ان تعامل الناس مع تلك الظاهرة قد اصابه البرود الشديد منذ زلزال 1992 الذى لم يتعدى حاجز الـ 7 على مقياس رختر. مع اننا نعلم جميعا ما الذى حدث عام 1992 ، و المهازل التى حدثت بسبب ذلك الزلزال.

اولا احب ان اتمنى السلامة لكل اهلى و اصدقائى الاعزاء فى مصر ، كما ادعو الله سبحانه و تعالى ان يحمينا و ان يبعد عننا كل شر ..

اما الذى دفعنى لكتابة هذا الموضوع هو ما كتب من تعليقات على موقع "مصراوى" على هذا الموضوع.

و قد جمعت لكم مجموعة من التعليقات التى توضح مدى تعامل جزء من الناس مع تلك القضية ...

الخبر على هذا الموقع

http://www.masrawy.com/News/Egypt/Politics/2008/july/15/earthquake.aspx

و يقول :

( مصراوي - خاص - وقع زلزال شدته 6.3 درجة بمقياس ريختر صباح يوم الثلاثاء وأحس به سكان القاهرة وبعض المحافظات.

وقال صلاح محمد محمود رئيس المعهد القومى للبحوث الفلكية والجيوفيزيقية لوكالة انباء الشرق الاوسط المصرية ان الزلزال وقع الساعة 6.26 صباحا بالتوقيت المحلي وكان مركزه جزيرة رادس فى بحر ايجا بين تركيا واليونان.

وأكد كثير من المواطنين لمصراوي ان الزلزال الذي وقع في الصباح الباكر أيقظهم من النوم بسبب الهزة الشديدة التي أحدثها.

ولم تتوافر حتى الان معلومات عن وقوع ضحايا او خسائر مادية في باقي المحافظات.

وقال خبير الزلازل افتيموس ليكاس للمحطة التلفزيونية "نيت" ان"الزلزال قد يتسبب بتسونامي صغير لكن هذا قد يكون خفيفا جدا في حال كان مركز الزلزال على عمق كبير". )

تعليقات ..

- نا كنت صاحى بدرى علشان وبتفرج على فيلم قراصنة الكاريبى قبل ما انزل الشغل
وحسيت ان الكرسى بيهتز بيا
بس قلت لنفسى شكلك لسه مصحيتش
تقريبا الهزة استمرت حوالى 15 ثانية

- انا كنت نايم فى العربية فى الزمالك و لقيت العربية بتتهز قولت مين الرخم اللى بيهز العربية ملقتش حد اتاريه الزلزال

- انا صحيت لقيت الكوميدينو بيتحكر قولت دا ارهاق قومت مكمل نوم اتارية زلزال

-"ممكن يكون غضب من ربنا"

-انا من اسكندرية حسيت بيه
والازاز وقع فى البيت واتصلت بالبوليس قالولى مفيش زلازل اطلع البيت عادى والله دة اللى حصل

- الحمدلله احنا فى الصعيد ماحسناش حاجه بدأت أحس انى عيشة الصعيد نعمه يارب ابعد عننا الكوارث وصدقونى دى دعاوى الطلبه والشباب اللى مش لاقى شغل

- السلام عليكم ورحمة الله وبركاته يااخوات يافضليات سبكوا من الزلزال دلوقتى نفسى اتعرف على اخت فاضله تحفظ معى القران لانى عندى اطفال ومش عارفة اتابع فى المسجد ياريت الى عندها استعداد تراسلنى على الايميل ---------------- ولو وجدت مشكلة فى الايميل تكتبلى على هذه الصفحة جزاكوا الله خيرا انا متابعة

- لوشعرحاكمنا بالزلزال فهذا من اجله وان لم يشعر به سوان افهذا من ظلم الشعب لنفسه

- الحمد لله محسيناش بحاجه فى (دولة) قطر مع انى مصرى

- نعم بنتى احست بيه بس كانت بتبكى وعندما سئلتها بعد الزالزل قالت ابكى خشية من ربى انا عملت اية عشان اموت بدون ان اصلى وازى ربنا حيخلينى من الشهداء اكيد فى الوقت دا حنكون من الكفار عشان الفرق بين المسلم والكافر ترك الصلاة والله وقامت وتوضئت وصلت وهى باكيا بنتى فى الصف الخامس الابتدائى شوفت اد اية انها عرفت ان الحياة ليست بيها خلود ولا بد من الزوال اتقو الله ايها الناس وجاء الوقت لتقرب الى الله وشكرا

- دى اثر الصدمة اللى الناس اخدتها فى الثانوية العامة

- انا كنت نايم و فى سابع نومه اصلى عايش فى زلازل علطول فى الشغل و فى اكل العيش و فى الدنيا

- والله كنت حاسس انى ربنا هايبتلينا بحاجةو حد يسئلنى جالك الاحساس دة منين والله كلنا عرفين الاجابة وهى الضياع الى شبابنا فية وطريق الظلام الى شبابناوبناتنا فية انا مش عايز اوضح اكتر من كدة لانة كلكة نظر لكن انا بس عايز اول كلمة وحدة اتئوا الله فى انفسكم و اهلكم
وفى الاول وفى الاخر دة انظار من رب العالمين
اللهم انك عفوآ كريم تحب العفو فعفوا عنا
ارجو الرسالة تكون وصلت

- ربنا يسترها علينا والمنتجين بتوع الافلام الصيفية اليومين دول نبأوا بأن افلامهم هتكسر الدنيا واكتر من زلزال يعنى هيعملوا افلام للكباريهات والدعارة والمسخرة ومش عايزين يحصل زلزال يبقوا مش عارفين حاجة فى شغلهم دى ناس واصلة اقوى

- والله كنت قاعده على الكرسى وبقرأ قرآن وكان الكرسى فوتيه كبير صعب انه يتحرك من مكانه وفجأه حسيت ان الكرسى بقى عامل بيا زى المرجيحه جريت مفزوعه من عليه وسألت اختى حسيتى بالزلزال قالت لى بمنتهى برود زلزال ايه مافيش زلزال ولا حاجه؟؟ الغريبه انها كانت صاحيه زيى!!!!

- منهم لله أصحاب العمارات والبيوت القديمة بيدعوا ربنا البيوت تقع فوق دماغنا عشان يستفيدوا بتمن الأرض صاحبة البيت رافعة علينا خمسين قضية رغم ان عندها 3 عمارات جديدة ومش ناقصة فلوس بس الجشع

- الناس الى بتتكلم عن غضب ربنا وانتشار المفاسد ارحمونا انتم ..فيه اختراع اسمه علم وحزام زلازل ودول زى اليابان عندها المشكلة دى ودول زى امريكا عندها مشكلة العواصف ودول زى جنوب اسيا عندها مشاكل مع الاعاصير بلاش خلط وتخلف

- غضب ربنا على شعب مصر فى الطريق ربنا يستر

و الان .. ما تعليقاتكم على هذا الموضوع؟!!

There was an error in this gadget