Saturday, April 30, 2011

خواطر ثورية | هلوسة

 

لأفضل تكوين فكرة عن حالتى و انا اكتب هذه التدوينة ، استمع للموسيقى المرفقة …

 

 

طن طن طن طن طنــــــــــــ

ناقوس الخطر..

طن طن طن طن طنــــــــ (تانى)

ناقوس الخطر … تانى

 

يا شعب .. اصحى يا عم .. الثورة ماخلصتش .. يالا يابا .. قوم عشان تفطر الفطار الثورى ، مانتا كنت ظابط ايقاع حياتك بقالك كام شهر ، بدأت تتعوج كده .. شغل بتاع زمان ده ماينفعش .. كله من الأكل الفلولى اللى كلته امبارح على العشا لما قالولك بورتو طره ..

انتو مش ملاحظين ان الثورة بدأت تدخل مرحلة الذكريات؟

لا ..

انتو عارفين دا معناه أيه .. معناه ان الثورة بالنسبالنا مجرد ماتش كورة او نهائى كأس افريقيا كسبنا فيه و شكرا كده فرحنا شويا و راجعين البيت و الدورى الأى كلام بتاعنا ده و الكورة التعبانة اللى بنشوفها فى ملاعبنا حاترجع تانى ..

واحد محلل رياضى بيهمس فى ودانى دلوقتى بيقوللى : اه ماهو اصل منتخب مصر دايما متعود على المعسكرات المغلقة و البطولات المجمعة .. لكن لو تاخد بالك .. احنا وصلنا كاس العالم مرتين بس.. عشان التحضير لكاس العالم بياخد سنتين على الأقل ..

همم … يعنى ماتش الثورة اللى ما بين مصر و تونس اللى متعادلين فى ده مش حايفرق معانا فى وصول كاس العالم ، داحنا احسن ثورة فى المنطقة العربية ..

اه .. طب مانتا اول منتخب عربى برضه .. و اول افريقيا كمان ..و خد دى منى .. حاتفضل عقد شمال افريقيا حتى فى السياسة .. تخيل كده تونس كل شويا التقارير من هناك بتقول انهم جايبين لعيبة ايه .. حريفة .. شغلين زى الفل .. و حايوصلوا كاس العالم ..

ايوه بس احنا كسبنا النظام على ارضه بضربات الجزاء انت ناسى 11 فبراير و لا أيه ، و خلينا المدير الفنى بتاعه (كابتن مبارك) يستقيل و المدرب العام احمد شفيق .. ده حتى ابو تريكة النظام القديم (جمال مبارك) اعتزل اللعب الدولى يا راجل .. و جبنا مدير فنى جديد مع ان مجلس الإدارة زى ماهو ..

طب و ماتش العودة ؟ انت ناسى ان اللعيبة واضح عليها الإجهاد ..

هو امتا ماتش العودة ؟

يا نهارك اسود؟ انت مش واخد بالك .. الماتش شغال..  و فى هجمات مرتدة كمان … هجمات بلطجية و طائفية و مكائد و مصايد ..

يا عم ماتقلقش المدير الفنى الجديد عارف شغله كويس ..

اهلا بيك .. حانرجع تانى .. يابنى احنا و الله لسا ماوصلنا كاس العالم .. و لا عشان كسبنا ماتش واحد خلاص .. فين النفس الطويل ..

يااااااه .. فكرتنى .. استنا كده لما اعيد الجون بتاع طره ده .. يا سلام .. شايف اللعبة الحلوة .. ملعوبة زى الفل ..

يابنى اصحى .. انت عمال تتفرج على الاجوان بتاعة ماتش الذهاب .. انقل على الجزيرة مباشر عشان ماتش العودة بيتذاع هناك .. و بيتذاع على أون تى فى كمان ..

طب ما القناة الثانية بتذيع الماتش برضه ..

لا لا القناة الثانية بتذيع تسجيل لمباراة اتلعبت سنة 52 .. بين الاهلى و الزمالك اصلا .. كان ماتش محلى ..

طب عايز اخد راحة .. و بعدين التحكيم مش عادل يا عم .. مش لاعب ..

يا عم انت مالك بالحكم قلنا 100 مرة تلعب على الصفارة و ماتشوحش للحكم عشان الكارت الأحمر ..

الحكم ده كان بيلعب زمان فى الأهلى على فكرة ..

مش مشكلة كان بيلعب فين .. المهم انت متدرب كويس و عامل مجهودك و لا لأ .. و بعدين الماتش متذاع على الهواء مباشرا .. انت ناسى ان الماتش الأوالانى الحكم كان متواطئ اساسا و كسبنا الماتش ..

يااااااه .. فاكر الجون بتاع لما رفعـــــ…

يابنى … اصحى ..فوووووووق .. انت ريحت من ساعة ما كسبت الماتش الاولانى .. مش حاتوصل كاس العالم ..

هوبا ايه .. هوبا اه .. ان شاء الله حانكسب .. هوبا ايه .. هوبا اه ..

يا بنى ..

دى فرصتنا الأخيرة نوصل كاس العالم … كاس العالم فى الديمقراطية .. فى الانسانية .. فى العلم .. فى التحضر .. فى الانتاج ..

لو متخيل ان الماتش خلص .. و عمّال تعيد فى الاهداف .. يبقا انت نفسك قصير .. مابقاش فى وقت للراحة .. مشوار البطولة طويل .. احتمال كبير جدا ماتشفش نفسك شايل الكاس .. لكن ابنك يستحق انه يلعب و يشارك .. و يجيب اجوان.

مستعد .. و لا فقدت الأمل خلاص ؟

 

(ايه رأيكم فى فكرة الموسيقى التصويرية دى ؟)

Thursday, April 28, 2011

خواطر ثورية | برلمانى رئاسى فرعونى

طيب .. برلمانى و لا رئاسى؟

حسب ما انا فاهم و يا ريت حد يصلحلى ..

يعنى ايه برلمانى؟

برلمانى ، يعنى حكومة حزب منتخبة من الشعب و رئيس وزراء هو المسئول عن تعيينات الحكومة، امال رئيس الجمهورية بيعمل ايه؟ حسب بقى .. يعنى مثلا فى المانيا رئيس الجمهورية ده واحد راجل طيب كده مسئول عن العلاقات الخارجية ، مسئول عن استقبال الرؤساء و شوية مظاهر لطيفة ، و ممكن بردو تكون ليه بعض سلطات حل البرلمان فى ظروف استثنائية ، مصر كانت عايشة شبه نظام برلمانى ايام الملك ، مع الفرق ان الملك كان يملك و يحكم فى نفس الوقت ، و طبعا كلنا شفنا المشاكل اللى كانت بتحصل بين الملك و الحكومات … فى النظام البرلمانى الأحزاب او ائتلاف منها يحكم البلاد.

من الأمثلة المثالية للنظام البرلمانى المانيا ، و انجلترا

امال رئاسى يعنى ايه ؟

رئاسى يعنى الشعب بينتخب رئيس ، و الرئيس معاه نائب رئيس ، و بيشكلوا حكومة ، و رئيس الوزراء هو اللى راجل طيب .. و الرئيس هو الكل فى الكل ، لكن فى نفس الوقت سلطة الاحزاب متمركزة فى البرلمان ، يعنى ممكن البرلمان يعترض على قرارات الرئيس ، و ممكن الرئيس يغتت و يعمل استفتاء شعبى لتمرير القرارات ..

من أمثلة الرئاسى ، امريكا و فرنسا

فى كلتا الحالتين الرئيس هو اللى يملك قرار الحرب ، و هو رئيس كل الهيئات التنفيذية فقط. يعنى مش المفروض الرئيس يكون رئيس محكمة مثلا ، او رئيس مجلس شعب.

امال مصر كانت ايه؟



احنا بسم الله ما شاء الله ، سرّنا باتع .. احنا عبارة عن كفته .. و خلينى اسامّيها نظام الكشرى .. اللى هو ايه؟



اللى هو ان مصر عدى عليها كل انواع الحكم ، حكم فرعونى الهى ، حكم رومانى ديمقراطى ، حكم اسلامى بالشورى ، حكم اسلامى من غير شورى ، حكم المستبد المستنير ، حكم المستبد اللى مش مستنير ، حكم دستورى برلمانى ، حكم عسكرى ثورى ، و بعدين اخيرا حكم مبارك اللى مالوش توصيف الصراحة ..

العامل المشترك ما بين كل ده .. فى اى نظام من دول .. ان اللى بيحكم مصر هو كل شيئ مهما كان النظام ، و مهما كانت الاشخاص و صدق اللى قال كرسى الرئاسة فى مصر مهمين على اى حد بيعد عليه

ايه سبب الموضوع ده ؟

ان المصريين دايما عايزين قائد جهبز جامد تحرير يمسكهم ، مافيش حد مصرى الا و نفسه فى واحد زى رمسيس او كليوباترا او عمر بن الخطاب او صلاح الدين او محمد على او عبد الناصر يمسكهم .. يا سلام نفسنا فى واحد كده يجى يملى الارض عدل .. يشيل الفساد .. يعمر الارض .. أب حنون .. زوج صالح .. و هكذا ..

و ده طبعا يتعارض مع فكرة ان الشعب مصدر السلطات ، لأن طالما احنا دايما بندور على شخص

يمتلك القدرة و النية على انه ينفذ مطالب الناس (بدماغه و حنكته و حكمته) ، يبقا احنا دايما نفترض ان ارادة الفرد هى ما تحكم ارادة المجموعة ، مش ارادة المجموعة هى اللى تحدد سلوك الفرد حتى و لو كان فى منصب قيادة للمجموعة.

ايه اللى المفروض يتغير؟

قوانين ، و دستور .. و أشخاص.. موافق .. لكن اهم من ده كله الناس ..

بيقولك قال يا فرعون ايش فرعنك ، قال مالقتش حد يردنى..

و احنا عايزين اللى يرد فرعون … حاتقللى : لا يا عم هما المصريين دايما عايزين حد فرعون يتحكم فيهم .. يا عم المصريين لو مشوها ديمقراطية حاتولع .. بسبب قلة الوعى المنتشر ..

تمام.. بس مانتا كده بترجعنا لورا تانى ، انت ناسى ان الدستور ايام السادات كان بيحدد فترات رئاسة الحكم و بعدين غيروها من مدة لـمدد أخرى ؟ .. مين اللى يضمن ان الدستور ممكن حد ييجى قافش كده فى يوم من الأيام و يقول الشعب يريد تغيير الدستور بأى كلام و نرجع تانى للمأساة ؟


انت مش ملاحظين ان احنا دايما بندور على فرعون فى أى حاجة .. حتى الكورة

ايه الحل؟

انا اقترح ان يكون عندنا كذا فرعون مش واحد بس.. عايزين فرعون اسمه التعليم .. و فرعون اسمه العدل .. و فرعون اسمه العمل و الانتاج .. ايه الأى كلام اللى انت بتقوله ده يا برنس …

صح؟ الكلام مش منطقى طبعا .. لأن احنا اصلا مش محتاجين فراعنة .. الزمن ده انتهى و لازم ننتهى من آفة الفرعون .. الحاكم المطلق ..

لازم ننتهى منها فى كل حاجة من أول الأب فى البيت لحد رئيس الدولة.



مش مهم برلمانى ، مش مهم رئاسى ، مش مهم مجلس عسكرى ، مش مهم مجلس مدنى ، المهم تضمنلى مافيش فرعون

Monday, April 25, 2011

خواطر الثورية | طب ايه النظام مع الانظمة ؟

 

زيارة د. عصام شرف للسعودية طرحت فى دماغى الكثير من الاسئلة المتعلقة بمستقبل العلاقات المصرية العربية فى الفترة القادمة خصوصا و ان المنطقة دخلت فى تأثرات نظرية الدومينو اللى بدأت بعد تونس بمصر نفسها و تمتد الآن لتصل الى البحرين و سوريا و اليمن و ليبيا. و نلاحظ ان كل دولة ظروفها مختلفة فى طريقة التعامل مع ثورتها و ان كان الجميع اتفق على “غشامة” و عدم نضج كل تلك الأنظمة القمعية فى التعامل مع مواطنيها فى الوقت اللى شهدنا انصياع ثم تهاوى للنظام التونسى و المصرى فى الخضوع لرغبات المطالب المشروعة ، بدون اراقة المزيد من الدماء.

طب ايه النظام مع الأنظمة العربية التانية؟

من اهم المشاكل اللى فى رأسى الآن هو اسلوب تعامل النظام المصرى الانتقالى الحالى مع الانظمة العربية و تحديدا اللى بيحصل فيها ثورات مماثلة لما حدث فى مصر. اولا ، لازم نفهم ان الوضع الحالى سيئ جدا بالنسبة لمصر لأنها لا تمتلك نفس الأدوات اللى كان نظام ثورة 52 ايام عبد الناصر يمتلكه لاحداث تغيير جذرى فى المنطقة كلها من دعم للثوار فى كل الدول خصوصا و ان مصر عبد الناصر كانت قادرة بإنضمامها للمعسكر السوفيتى ايام الحرب الباردة و حركة عدم الانحياذ لتوفير غطاء نفوذ دولى سياسى قوى بجانب قدرات ابناء مصر على الانتاج و التأثير و دعوات حلم الوحدة العربية و التخلص من المستعمر و الى ذلك.

اما اللى عندنا دلوقتى فهو ان المستعمر اصبح هو الانظمة العربية المختلفة ، و مصر فقدت الدور الرئيسى فى التأثير على الأنظمة العربية فيما هو من اجل متطلبات شعوبها لأن النظام المصرى السابق كان جزء اساسا من تلك الأنظمة ، يعنى مثلا مابقتش مصر ممكن تعطى تعليمات لنظام عربى معين بإلاستجابة لطلبات شعوبها، بل بالعكس كان هدف النظام السابق دائما هو عزل مصر تماما عن التأثير “المخاطرة بدور القيادة الحقيقية” فى المنطقة و الاكتفاء بدور المفاوض و الحكيم بين الدول. و طبعا مصر بعد 25 يناير هى مصر الثائرة اللى عايزة المنطقة مثلها و مثل تونس… او هذا ما اتخيله على أيه حال.

الشعب المصرى لا يمكن ان يكون فى أى موقف غير مساندة الثورات فى سوريا و البحرين و ليبيا و الاصعب من كده ان الشعب المصرى ينتظر من وزارة الخارجية انها تكون بتعبر عن موقف الشعب المصرى الداعم لتلك القضية حتى و ان كانت الادوات مش متوفرة لتحقيق الضغط السياسى المطلوب بسبب ان احنا مرتبطين بعلاقات مع النظم العربية اقتصاديا و امنيا و هكذا ..

يا جماعة فى فرق ما بين توضيح تماما ان المصريين يريدون ديمقراطية حقيقة فى الدول العربية الأخرى و ما بين الخوف على العلاقات العربية المصرية ، بالعكس .. لازم قوة مصر يصبح لديها انياب و دور اساسى فى المنطقة لعودة الدور الطبيعى فى المنطقة بالعمل على منطقة عربية متعاونة اقتصاديا و اجتماعيا و اولا حرة .. لكن دفن راسنا فى التراب لن يحل المشكلة خصوصا و ان له تأثير على الداخل المصرى و يطرح اسئلة من نوعية : هى الثورة وصلت فعلا سياستنا الخارجية؟

من ناحية تانية ، لازم نصبر شويا ، لأن عشان يكون لينا دور لازم نعمل لنفسنا منظر ، يعنى لازم يكون لدينا قدرة على تحقيق مطالب الثورة للعدالة و نهوض الدولة جزء منه اتحقق ، و بالتالى فإن توخى الحذر فى الفترة الانتقالية لعدم تحويل النظم العربية المتخوفة من الثورة فى مصر الى عدو هو شيئ محمود.

يعنى من الآخر كل الطرق تؤدى الى النهوض بالواقع المصرى اولا .. و بشكل متوازى على سياستنا الخارجية ان تكون اكثر ثقة فى التعبير عن وجهة النظر المصرية بمساندة من يناضلون ضد الفساد و القمع مثلما حدث فى مصر.

و لعلنى الخصها فى جملة : محو امّية قرية فى وسط الدلتا او الصعيد ، يساند كل ثورة فى المنطقة ضد الفساد و تقييد الحريات ، و عندما ينادى منادى من ميدان بدمشق ، على التحرير ان يلبى النداء.

Friday, April 22, 2011

خواطر ثورية | جواب لأم ماجد

هذه المدونة ردا على مقال الأهرام بتاريخ الخميس 21 ابريل 2011 بخصوص زيارة ام ماجد للرئيس السابق لمدة خمس دقائق

http://www.ahram.org.eg/The-First/News/73944.aspx


ommaged للافضل استمتاع بهذة التدوينة – شغل هذه الموسيقى

الى الحاجة ام ماجد ،

ازيك يا حاجة ..ازيك يا أمّى .. ان شاالله تكونى بخير و صحة سلامة ..

و الله يا حاجة انا ليا عليكى عتاب صغير بس ، انا عارفك من زمان .. ست اصيلة .. ست حنينة على ولادها .. ست ماتعرفش الشماتة .. بس حز فى نفسى اسيب الموضوع ده .. قلت لا بقى .. لازم ابعتلك بنفسى ..مع ان عارف من جوزك الحاج طه البدوى انك شايله منى كتير…اصل انا بقالى كتير و لا بسأل عليكى و لا حاجة .. عارف .. لحد ما المرض كل جتتك ، بس نعمل ايه يا حاجة .. مانتى شايفة العين بصيرة و اليد كانت قصيرة لحد ما اهل البلد وقفوا وقفة رجالة .. بس و حياة غلوتك عندى انا ليا عتاب صغير..

ايه اللى انت عملتيه يا حاجة ده ، تعيطى ؟ و ليه .. انتى المفروض تزغرطى مش تعيطى .. انت مش شايفة ولاد بلدك و لا أيه .. مش شايفة اللى ولادك عملوه ..احنا حررنا البلد يا حاجة .. احنا صحّينا ولادك و خلناهم ينزلو الشارع يطالبوا بحقهم فى الارض و المال و الأهم حق الكلام يا حاجة.. و بعدين بتعيطى على مين ؟ على ابو دومة ؟ الراجل اللى كانت عصابته رعبانه فى الحارات ، و البيوت ، فى السما و على الأرض .. بتعيطى على ام قويق اللى كانت مصممة ابنها يمسك ؟ لا لا عيب عليكى يا حاجة ام ماجد يعنى .. ده حتى ماجد نفسه فى آخر جواب بعتهولى كان مش قادر .. كان طهقان .. لا لاقى شغل .. و لا لاقى تعليم كويس .. قاعد على القهاوى ..و بيشرب مزاجه طول النهار و الليل لحد ما عينه ازرقت .. و اتهرت جتته من الحقن .. ماعرفش حتى يدبر الشقة عشان مقصوفة الرقبة اللى قال ايه ابوها عايز شقة فى المهندسين زى ابن ابو دومة و الحرامية بتوعه .. ماتفكرنيش و النبى .. ربنا ما يرجعها دى ايام..

و بعدين ايه البوسة دى يا ام ماجد .. طب ابو ماجد طيب موافق على الكلام ده ؟ و لا ابو ماجد مالوش لازمة فى القاعدة يعنى .. اخص عليكى اخص .. لا اخص بجد يعنى .. ده لا يرضى ماجد و لا يرضى ابوه .. و لا يرضى اهل الحتة الصراحة ..

و بعدين انتى نسيتى يا ام ماجد؟ لحقتى تنسى؟ دانتى طيبة اوى صحيح .. ناسية اللى ابو دومة عمله فينا فى ال30 سنة اللى فاتت؟ هو و لا مش هو بقى .. هو كان الكبير .. و الكبير مسئول .. على راسى من فوق عيان و لو كبر فى السن .. احنا طول عمرنا بنحترم الكبير .. لكن نعيط عليه ابو دومة ؟؟ تبقى نسيتى عياطك على ماجد السنة اللى فاتت لما رمى نفسه فى البحر .. هربان من ابو دومة و عصابته .. رمى نفسه فى القارب و ربنا نجاه بس عشان كاتبله يشوف ابو دومة و حق ربنا بيسرى عليه ، زى ما حق ربنا بيسرى على البنى آدمين .. و لا انت مش مؤمنة يا حاجة؟ .. دانتى عاملة حجة و عمرتين .. و ربنا انا زعلان .. طب يمين بالله لو كان ماجد شافك و انتى بتعيطى على ابو دومة كان زمانته رمى نفسه فى البحر تانى ..

معلش يا ام ماجد استحملى كلامى ، انا عارفك ست كبيرة و ابو دومة له جمايل عليكى برضه زمان ، بس ماتنكريش انه كان مطفحنا الهم و مكبر مخه ..مش شايف او مش عايز يشوف .. غلطان يا حاجة و النعمة الكل بيقول كده .. الغلط راكبه من زمان .. و طالق علينا ابنه و شلته ... اللى راجع قال يمسك البلد كده .. و يسجن الكل .. كل الحرية .. كل الفكر .. كل العمل..

و النبى ماتعيطى عليه تانى .. زغرطى يا ام ماجد .. عشان البلد تقوم .. عشان ولادك مايزعلوش .. انا دك النهار كنت معدّى فى الحارة ، لقيت العيال اللى انت عارفاهم ولاد الكلب شمتانين فينا و بيقولو ان اللى احنا عملناه ده مش جايب نتيجة .. بقى يرضيكى يا حاجة كده؟

انا مش شمتان فى ابو دومة ، الراجل كبير و مهما كان ابن البلد .. و انا و غلاوة ماجد عندنا كلنا انت عارفة لما كان اى حد من ولاد عمنا بيتلكم كلمه عن ابو دومة ده .. كنت باطلع عين ابوه .. و اقله بس ياض مالكش دعوة بسيدك لأقطع دراعك يابن الكلب.. ايوه سيدك .. حتى لما كنت باسمع انه قاعد معاهم و بيزورهم و يزوروه .. كنت بعيط لوحدى .. على الهم اللى عايشين فيه .. لكن اقطع دراع اللى يقرب من اهل حتتى و لو من ابو دومة نفسه ..

بس مش حاعيط عليه .. عشان الظلم وحش .. و دم الناس اللى راحت دى ماترحش هدر كده .. مش عايز الطار جوه العيلة .. انا عايز الأنون ياخد مجراه يا حاجة ..و ربنا يجازى اللى كان السبب بقى ..

و ان طلع براءة ربنا يسامحه .. كده كده عدل ربنا نازل عليه ، زى ما هو نازل علينا كلنا ، و لا حد حايقدر يوقفه..

ماتعيطيش يا ام ماجد و النبى .. بدل ماتعيطى على ابو دومة ، زغرطى على ولادك اللى ضحوا بحياتهم و ماتوا عشان ماجد يعيش..زغرطى للشهيد يا ام ماجد .. و ماتعيطيش.

ابنك

مصرى

…عندنا دراما غير اى دراما .. ثورات مصرى … ام الأجنبى..

Tuesday, April 19, 2011

خواطر ثورية | فاكس فى الثورة على الفواكس 2

 

fakes_thawra

.. اولا قبل ما نبدأ نحب نحيى النائب العام .. و المجلس العسكرى و شباب الائتلاف .. و شباب التحرير و اللى بيهتفوا ضد المجلس .. و اللى بيهتفوا للمجلس ..  و اللى عايزين مجلس مدنى .. و اللى عايزين عمرو حمزاوى امين شارع جامعة الدول .. احبها برلمانية.. و احبها رئاسية .. و انا و انت .. و قول ورايا..

النائب العام ..النائب العام تانى .. .. يعنى طره ..بورتو طره  ..  دولة بورتو طرة المتحدة .. يعنى خمستشارات ..خمستاشر ليا انا .. و خمستاشر ليك .. يعنى الكانون فوق الجميع ..  يعنى النظام القديم علـجديد فى الحبس ..يعنى مبارك حبيب الملايين بقى مبارك عايزين الملايين  .. يعنى الجنين فى بطن امه اللى قال نعم لمبارك بقى فلول  .. يعنى بيدزا لكل مواطن .. يعنى ميدان التحرير فى التحرير و سمّعنى احلى سلام حمادة هلال يا جدااااااااااع.

فاصل موسيقى ..(موسيقى شعبية)..

طيب نبدأ دلوقتى وصلة فاكس فى الثورة على الفواكس ..

 

- فاكس تعيين المحافظين ما هو اصل قلنا عايزين ادارة HR فى الحكومة ماحدش سمع الكلام ..شفتو اللبش اللى حصل فى قنا ده؟ .. و الناس اللى مدخله الحجات فى بعضها .. و الناس اللى بتصطاد فى المية العكرة ..  هى الانتخابات هى الحل .. احنا الاستفتاء اللى فات ده كان لطيف و ظريف و الكل بيحترم رأى التانى و بتاع .. و بعدين اللى نفسو فى حاجة يعملها و ادينا شفنا غزوة الصناديق و شفنا اعلانات لا للتعديلات اللى بيفكرنى بالاعلان بتاع المدرسة الشهير بتاع انا باخد فيها .. و فى الآخر انا قلت لأ و انا عارف انها مش حاتفرق اساسا .. ما علينا .. و أطمن السادة اعضاء ائتلاف الثورة المضادة و مريدي سيدى ميدان مصطفى محمود ، ماتقلقوش فى فرص كتيرة لأنكو تخربوها بردو .. بس احنا عايزين البلد تمشى بنظام عادل على الكل و اوله سياسة اختيار المحافظين اللى ماحدش فاهمها .. تكون بالانتخابات .. و انا اؤكد لكم ان الناس القلقانين ان المسيحيين مش حايمسكوا قيادات بالشكل ده ان العدالة و انتخابهم هايحصل بالوعى و بتهميش التيارات المتطرفة (التطرف لا يساوى السلفيين ، كل تيار فيه متطرفين .. حتى الليبراليين عشان بس نجيب من الآخر) ، ما ننساش ان مصر فى وقت من الاوقات كان عندها رئيس وزراء مسيحى (هو كان من 100 سنة اه انا عارف) بس بجد انا بحس ان اى انسان فى مصر لما الناس بتحبه للخدمات اللى بيقدمها او العمل او المواقف الناس بتأيده ،  و بعدين احنا عايزين نحط قواعد سليمة و نسيب الطبخة تستوى شويا .. ماتنسوش ان النظام اللى فات تصرفاته فى احتواء الازمات بين اتباع الديانتين كانت كتير بطيئة و لا تأخذ العدالة على محمل الجد و السرعة.. فكل واحد شايل فى نفسه لو شاف العدل بيطبق حتى لو مش فى الجيل ده ، الاستمرار عليه حايعمل بيئة احسن ..نتقل شوية يا شعب ..

- فاكس القرارت اللى مش عارفين هى حصلت ليه بسبب عدم الشفافية ، يعنى مثلا محافظ جه .. محافظ استقال .. و طول ما الاعلام الرسمى ماحدش بيثق فيه حانفضل فى القلق و التخبط ده .. انا بصراحة مع استقالة المحافظ بتاع قنا لأن اصلا قرار خاطئ او مش محسوب بعض النظر عن ديانته .. بس بعد كده مافيش حجة لأى حد و مافيش اى مظاهرات تبرر رفض ادارة محافظ لمحافظة على اساس الديانة ، الكلام عن الامامة مش فى محله اطلاقا و حتى لو فى ناس ضده و ده حقهم بردو فإن اسلوب التعبير ده مش مظبوط خصوصا لو مافيش اجماع شعبى على التفسير بالشكل ده .. و بعدين مش اول مرة تحصل يعنى .. و نرجع و نقول العدالة الاجتماعية و المساواة على الكل من غير حلول استثنائية او افتكاسات هى صمام الآمان .. اللى غلط سواء كان مسلم او مسيحى يتحاكم بالمساواة الكاملة .. القانون اللى بيقول كده .. و الدستور بيقول كده .. و ايمانى بالشريعة الاسلامية اللى مبنى عليها المادة الثانية بيقول كده بردو. هما المسلمين و المسيحين اللى كانوا فى التحرير دول جايين من المريخ مثلا؟ فين روح التحرير يا أهل التحرير؟

- فاكس كاميليا شحاته دى… مين دى يا جدعان .. عارفين بتفكرنى بالحاجّة بتاعة حرب البسوس دى .. اللى قالت “واا واذلاّه ” فحرب قامت بين قبيلتين لمدة 40 سنة نعوذ بالله .. و بعدين هى فين .. انا نفسى اشوفلها كليب على يو تيوب طيب .. مكالمة تليفونية حاتنجز الحوار ده من الآخر .. ما هو فى غموض غريب .. و اغلبية الناس الموضوع ده مش حارقها اوى .. بس ترك المشكلة دى اه مش هى الأساس بس بتستخدم كحجة .. فرسالة لعمّو شرف و النبى شفلنا الحوار ده مع عمّو العيسوى و قيادات الكنيسة… و لو مش موجوده يطلعوا يقوللنا ان دى كانت حاجة وهمية اصلا .. بالشفافية و الادلة.

- فاكس اسماء الائتلافات الكتير دى .. فى اية يا شباب بالراحة على الشعب .. ائتلاف التحالف القومى القافش .. الائتلاف التعبوى الثورى العالمى .. الائتلاف التقدمى الكتكوتى .. و الله ما عارف افرق ما بينكم و لا عارف ايه الفرق طيب .. ما كلنا شباب .. و كلنا شاركنا فى الثورة (ما عدا انا عشان فلولى مسافر بره مصر حاليا بس ان شاء الله راجع و حا ـــ فاهم؟) .. لا بجد .. لو كل ائتلاف من دول بيعبر عن فكر سياسى معين ، اشتغلها احزاب بقى .. عندك اعلان دستورى .. و عايزين نجرب مؤسسات الدولة .. اصل فى الآخر الائتلافات دى بعد كام شهر حانبتدى نتكلم عنها و نقول دورها أيه .. انا مع الرقابة .. لكن بشكل مؤسسى بمعنى انا عايز يتفتح مجال للشباب للعمل فى المنظمات الحقوقية و المجتم المدنى من ناحية و حرية مشاركة اى مصرى فيها .. و عايز اطار يسمح بنشر تقارير المراقبات و الاجتماعات ..منظمات .. جمعيات .. فى أطر كتير لتحقيق ده اصل من كتر الائتلافات دى انا حاسس انها شلة و شلة تانية .. بقولكم ايه.. لو فضلته تعملوا ائتلافات كتير كده .. انا اطالب بإنتخابات داخل الائتلافات بقى ها ؟ .. كلمة ائتلاف اصلا بتفكرنى بشغل الجماهيرية الليبية الاشتراكية العالمية العظمى بتاعة القذافى ربنا يفك زنجته.. من انتم؟!!!!! ..

انا شايفها احسن احزاب احزاب .. انا خايف اصحى الصبح قلاقى الحزب الوطنى الجديد من اجلك انت مصلحتك اولا رجع تانى بتى شيرتات الاديديس الجديدة  ..و كلنا عارفين ان تغيير الفانلة بيعمل شغل .. بيقلك منتخب البرازيل غير فانلته من ابيض لأصفر و من ساعتها و هو عمال يكسب كاس العالم ..  انضموا لأحزاب او اعملوا احزاب جديدة و  فى كل حزب لجنة شباب قوية تعبر عن فكر الحزب و تجدد دماؤه و تضم ليها مصريين من كل انحاء مصر.. و من ناحية تانية نفس الشباب او شباب تانيين فى منظمات المجتمع المدنى يراقبوا الحكومة بقى .. و ماتنسوش جهاز حماية المستهلك و النبى عشان الأيام اللى جاية دى مأساة. (بالمناسبة الائتلافات كانت خطوة مهمة و اساسية جدا ايام الثورة لما كنا بنقول مين بيمثل مطالب الشباب .. لكن التحول الديمقراطى عايزينو اسرع من سقوط النظام ، و اولى خطوط التحول ده حياة سياسية آمنة و مبنية على افكار مش افراد و لو كانوا شباب)

- فاكس الاغانى البروباجندية اللى على القناة الأولى و الثانية دى .. الناس دى عايشة فى وادى تانى خالص .. و الله كل ما بشوف القنوات دى افتكر ايام سودة .. رسالة واحدة من الجيش على الفاسبوك تأثيرها اقوى مليون مرة من الأغانى ، و ماحدش يقوللى طب ما زمان كان فى اغانى ثورة .. ده زمان فى الخمسينات .. دلوقتى احنا فى الالفية الثالثة ، الاعلام الموجه بنفس اساليب زمان اصبح ساذج بالنسبة للناس .. عايز اعلام موجه؟ .. اتفرج على قناة اوباما اللى على يو تيوب .. و شوف الهاى ديفينشن كاميرا عاملة احلى شغل .. و التصوير الديجيتال الجامد ..اقولك .. سيب حرية الابداع و الرأى و من نفسك حاتلاقى اعمال فنية و شعرية و ادبية تأثيرها اقوى من اية توجيه اعلامى .. و بعدين احنا لاغينا وزارة الاعلام ليه .. دى حتى ايام ثورة يوليو كان اسمها وزارة البروباجندا ..

- فاكس تسريحة شعر ريم ماجد الجديدة .. (ماتجربى اللى هو ملولو ده .. احلى) و بالمناسبة يسرى فودة انت ان شاء الله كده حاتكون اعلامى الجيل.

- فاكس حملة البرادعى تماما .. انا من مؤيدين البرادعى 100% بس بالأسلوب بتاع الحملة ده .. يقبا حد يقابلنى لو عرف يجيب 10% من الأصوات و ساعتها حانعد نقول الفلول و الثورة المضادة .. يا قائمين على الحملة انتو اتأخرتوا جدا جدا جدا .. اساسا الحملة دى كانت المفروض تبتدى قبل الثورة .. و دلوقتى فى ناس تقيلة دخلت السبق .. فين البرنامج .. فين زيارات الميدانية .. و بعدين بصراحة بقى انا مش حاسس ان البرادعى نفسه متحمس .. التواضع حاجة و تحقيق الهدف حاجة .. و بعدين يا دكتور اذا كنت انت بتقول انك عايز تخدم البلد فى اى موقع فانا شايف ان احسن موقع ممكن تخدم البلد منه بالنسبالك هو رئاسة البلد .. و فاكس تخيل ان تويتر و فاسبوك هما المعبرين عن صوت الشعب كله .. ال 80 مليون .. انا سمعت واحد شاب بيقول احنا بنعبر عن مطالب الناس اللى عملت لايك على الجروب بتاعنا .. لا يا برنس .. انا عايزك تعبر عن مطالب الناس اللى ماعندهاش فاسبوك اصلا ..

- على فكرة منتخب الشباب بيقولك كسبان فى بطولة افريقيا .. و لا حد متابع طبعا .. كده انا مطمن

- فاكس المحاكم الاستثنائية لمدنيين تماما .. و هو المجلس قال حايعيد النظر فى اسامى الناس اللى عندهم .. مع انى عمرى ما حد اتعرض امامى فى عرض وجهة نظرى الحمد لله .. و شايف انه بيحصل تجاوزات من بعض المدونين فى اللغة و اسلوبها الا ان ضمان الاستقرار اللى احنا عايزينو ولأى فرد ان تتم محاكمته فى محكمة عادلة زى بتوع طره، و انا اضمن ان اى واحد اهان الجيش او ضد التجنيد او مصالح البلد ان مافيش و لا واحد مصرى حايقبل تصرفه او يتعاطف معاه ، حتى تحت مظلة حرية الرأى و التعبير. لأن الكلمة المنشورة مسئولية مثل التصرفات تماما.

- فاكس التريقة على العجلة.. كفاية كده بقى .. اظن عايزين نستغل الفترة بتاعة عصام شرف اللى جاية دى فى ان احنا نقوم البلد باللى نقدر عليه .. عشان نعرف نسلم السلطة بشكل سليم من حكومة للتانية .. ما هو اصل انتو مش واخدين بالكم ان لو فضل الحال كده ممكن حد فلولى يقترح توقف عجلة الاصلاحات السياسية عشان الاقتصاد واقف .. وساعتها الموضوع حايعقد اوى و المليونات تأثيرها مش حايبقا زى الأول .. عايزين نتعود على ثقافة العمل و المجهود المجتمعى بشكل موازى مع اداء السياسة ، الاتنين بيخدموا بعض .. و الاتنين صمام الامان لإنتقال آمن للسلطة فى السنين القادمة ..

بس كده .. و ماحدش يقوللى انت بتاع كلام و خلاص .. اصل دى خواطرى مش برنامجى الانتخابى …

- و كافية التريقة على تسريحة شعرى على تسويتسر (زى ما يسرى فوده بيقولها).. قد تندمون يوما من الايام .. اللى بيته من الزجاج مايحدفش الناس بالحجارة.. هاشتاج يا مفتريين عشان شعرى .. الله يمسيك بالخير يا خفاجى كان يقوللى : بالموجة اللى فى شعرك دى عمرك ما هاتفلح

 

There was an error in this gadget