Monday, December 24, 2012

الكبت وحش ..


انت عارف لما بتوصل لمرحلة أنك مش عايز تتكلم فى أى حاجة ليها علاقة بالأمل أو أى فكرة إيجابية لأن اللى حواليك أو شايف رد الفعل غالبا هيكون يا تريقة يا مسخرة يا محاولة مستميتة لوضعك فى نفس قالب الاحباط اللى الحواليك فيه ؟
حاسب .. انت كده بتكبت فى نفسك.. و الكبت وحش.. وحش مافيش كلام !
ماتسكتش.. قول و اتكلم هتساهم و لو للحظة حتى فى وسط كل الهري  ده فى أنك تخلي الناس تفكر بشكل إيجابي .. بدل ما يحصلك فيد باك لووب .. يعني تخش فى دائرة مفرغة من الافكار اللى توصلك فى الآخر للإنهيار..
انت عامل زى نقطة فى نسيج بيتحرك كله مع بعضه .. مش مهم النسيج نفسه  يكون قوي بالدرجة الكافية .. المهم أنك انت تبقا قادر تحافظ على وحدة النسيج ده .. لازم تكون قادر تحس بالهارموني بتاعة حركة النسيج اللى انت جزء منه عشان تقدر تلعب دورك صح .. حتى و لو قدراتك أكبر .. أو شايف انك تستحق أكتر من كده ..
أما عن التمرد فده موضوع تاني .. 

Sunday, December 23, 2012

لحظات




أول ما تلاقي نفسك على شفا حفرة من الوقوع ..
أول ما تلاقي نفسك بدأت تفقد الأمل ..
أول ما تلاقي نفسك حاسس أنك مش مسيطر على عالمك ..
أول ما تلاقي نفسك حاسس بالعجز أمام واقعك اللى بتواجهه ..
اول ما تحس أن الفرص اللى قدامك بدأت تضيع واحدة ورا التانية ..
أول ما تحس أنه ما باليد حيلة .. و أنك فاقد القدرة على الإيمان ..
أول ما تحس أنك بتبعد عن ربنا اللى حاميك و اللى بيديك الأمل ..
أول ما تحس أنك بدأت تبقا معتمد فى حياتك على حاجات مالهاش معنى ممكن تكون انت مش مؤمن بيها و شايفها مضره ..
أول ما تحس أن الناس اللى حواليك بيبعدوا عنك مع أنهم موجودين قدامك ..
أول ما تتعالى أمام نفسك و تحس أن أنانيتك طغت على شعورك بأنك جزء من العالم ..
أول ما تحس أن صديق ليك نفسه يقولك حاجة بس مش عارف يقولهالك .. نفسه يقولك انك اتغيرت..
أول ما تلاقي نفسك مشغول أوى بنهاية عالمك .. لأنك حاسس أنك مش مسيطر ..

أعرف أنك فى خطر.
أعرف أن مخك مش هيسيبك كده و هيديك جرس انذار كبير لازم تفهمه عشان تعرف تكمل..
الطريق طويل و مايفعش أنك بالسهولة ديه تستسلم ..
أعرف أنك لما هتحتاج الناس اللى حواليك هتلاقيهم .. لما تدور عليهم ..
أعرف أن اللجوء الى الله مش كلام و بس.. ده بكل حتة فى جسمك و فى روحك..

فوق .. ماتسبش نفسك ، ماتستسلمش. لازم وقفة مع النفس أمام الاحباط..
نفسك و جسدك تقدر تخلي منهم صديق و عون و سند لروحك فى طريقك و ممكن يكونوا أكبر عدو ليك لو سبتهم ..
أقف .. و افهم .. و ركّز .. انت اكتر واحد فاهم نفسك .. و التغيير هيبتدى من عندك..

إتغير.
فوق.
و جاهد نفسك.
There was an error in this gadget