Sunday, October 27, 2013

عجيب في بلاد العجائب | هاللو مستر بريزيدنت



عجيب في بلاد العجائب | هاللو مستر بريزيدنت

أهلا بكم.

إمبارح كان العيد القومي للنمسا فأتفقت مع صديقي Mohammed Farag ننزل نتفرج على اللي بيحصل و بتاع. كرنفالات في الشارع و الجيش و الشعب أيد واحدة و تسلم الأيادي و كده. و عاملين معرض لمنتجات الجيش في هذا اليوم زى مثلا ملابس الجيش و شوية النياشين و جواكت ضد الرصاص والجو ده. و عاملين معرض لوظائف الجيش الشاغرة. 

المهم و احنا بنستمع للموسيقى العسكرية (فرقة حسب الله النمسا) لقيت الناس واقفة طابور كده قدام القصر الجمهوري. طلع أنه القصر الجمهوري بيفتح للجماهير اليوم ده لأي زائر يخش يتفرج و يشوف المكاتب من جوه على الهواء مباشرة كيف يتم ادارة الدولة.

وقفنا في طابور طويل عريض (الطابور كان طوله 2 كيلو و نص مثلا بس احنا لأننا مصريين خرمنا كده من عند حتة - خبراء طوابير بقى يا معلم) و دخلنا. و احنا على الباب لا خدوا اسامينا ، و لا احنا منين و لا جايين منين و لا ديانتنا أيه و لا أى حاجة تدل على أى هوية الموضوع ببساطة تفتيش زى بتاع المطارات و حتى ادونا التليفونات عشان نصور. الشبكة نفسها حول المكان كانت مشوش عليها لحساسية المكان فمفيش سيجنال. دخلنا جوه لقينا موظفين الرئاسة بيكلمونا عن المكان و أهلا و سهلا و ده مكتب السكرتير و دي مكاتب الموظفين و ده بهو الاستقبال اللي أخره مكتب الرئيس. لقينا الرئيس هاينز فيشر واقف هو و مراته بيسلموا على المواطنين (او غير المواطنين) و صورة مع مواطن صيني و أخرى مع افريقي و أخرى مع طفل و شغل الصور السياسية اللي احنا عارفينه ده.

دخلت على الراجل سلمت عليه ازيك يا مستر بريزدنت إت أز ماي هونور تو مييت يو قاللي أللس جوتا (يعني كل سنة و انت طيب) قلتله ممكن فوتو؟ قاللي أه و ماله. قلتله و مع الحاجة و النبي كمان. 

خدنا الصورة اللي انتو شايفنها دي.

طبعا الصورة هدفها الأول الإحداث و الزياطة خصوصا أني زى مانتو شايفين لابس أديداس يعني الموضوع مكنش فيه ريحة الأهمية. لكن بتفكير عميق قليلا في الصورة اتعلمت حاجات كتير:

في مجتمعات و دول شالت الهالة اللي محطوطة حوالين الرئيس (بالمناسبة هو كرئيس دوره شرفي زى عدلي منصور كده) مش علشان تهينه بالعكس عشان ترتقى بنفسها من فكرة الحاكم المسيطر على كل شيء لفكرة الشعب اللي بيحكم نفسه من خلال الدولة بمقوماتها. اتعلمت ان نجاح الدولة في قدرتها على توحيد صفوفها و قدرة كفاءتها على الإعطاء و قدرتها على كسب ثقة أغلبية الشعب (مستحيل كله) بأساليب بسيطة و سهلة و بإعلام محترف و بفكر مختلف يتماشى مع حركة التاريخ في الآخر هو إنعكاس لقدرة المجتمع على أنه يعمل ده في دوائره. 

الدولة الفاشلة هي اللي مش قادرة تحقق السلم الاجتماعي بسبب سياسيين أغبياء و مسئولين فاشلين مش قادرين يستوعبوا اللي حصل في ال 100 سنة اللي فاتت في العالم من دروس و حروب و نزاعات و تطور و مش كده و بس ده كمان بيرموا المسئولية على المواطن العادي اللي دمه رايح و مستقبله مجهول وتكلفته وسط كل هذا الصراع صفر.

Sunday, October 6, 2013

خواطر في متاحف نمساوية

كل سنة و أنتم طيبين بمناسبة 6 أكتوبر.


إمبارح كان يوم المتاحف في فيينا و في اليوم ده المتاحف بتفضل فاتحة لحد بليل (عشان الناس تنبسط) و ثقافة و الجو ده. بتشتري تذكرة ب 11 يورو و بيدوك كتالوج بكل المتاحف اللي في المدينة و تزورها زى مانتا عايز. شيء لطيف. أصطحبني في تلك الرحلة الصديق الدكتور محمد فرج Mohammed Farag و اختارنا أننا نزور 4 متاحف و هما :


متحف المخطوطات و البرديات
متحف الحفريات
أرشيف الحكومة النمساوية


المهم دخلنا متحف الورق و البرديات لقينا معرض لأهم البرديات و المخطوطات في عصور مختلفة بدأنا بالعصر الفرعوني طبعا و شفنا برديات مختلفة بتحكي قصة المصري القديم (اللي احنا بنتعامل معاه على أساس أنه جي من المريخ ده) و هو في الحقل بيزرع و بتاع و أجزاء حقيقة من كتاب الموتى و لفافات عليها كلام بالهيراطيقية و الديموطيقية و الهيروغليفية. و بعدين من العصر الفرعوني للعصر اليوناني و الروماني ثم القبطي برضه برديات زى مثلا خطاب من ضابط شرطة (أمن دولة غالبا) كان باعت لفلاح بيقوله قولي عدد الشجر اللي عندك و كام شجره تبع الكنيسة و كام شجره تبعك و أسامي الفلاحين و شغلانه كده و في الآخر شكرا لتعاونكم. بعدين دخلنا على العصر الإسلامي و إتفاقية صداقة (حماية) مكتوبة باليوناني و العربي بين المسلمين و المصريين و برضه شوية حاجات تمثل الزمن ساعتها زى مثلا وثيقة ضرايب واحد كاتبها و سور من القرآن الكريم و في ركن كده حجاب مكتوب بالعربي و زيه باليوناني عشان يحميك من عضة الكلب.


شيء لطيف أنك تقعد تتمنظر قدام الناس و انت عارف تقرى العربي اللي مكتوب من 1000 سنة قدام السياح الأجانب (و أهل البلد) اللي لا عارفين يقروا هيروغليفي و لا يوناني قديم و لا لاتيني بالسهولة. لكنه شيء حزين في نفس الوقت. لأنك بتتمنظر بيه بس. في حين أنهم ترجموه و بيدرسوه و بيستفيدوا منه بقالهم 500 سنة و انت قاعد في بلاعة و مش عايز تخرج منها.


المدهش الحقيقة و الحاجة اللي لفتت نظري في كل البرديات و اللفافات دي اللي على مر العصور كلها في 80% من المتحف أن كل اللفافات ديه كانت من مدينة واحدة : مدينة الفيوم. يعني متحف كامل كبير عريض طويل لتطور البرديات في العالم كله باللغات بالثقافات بتطور الكتابة مبني على مدينة واحدة "الفيوم". 


و طلع أن في واحد نمساوي من اللي كانوا بيتاجروا في الخضروات مع مصر في القرن ال18 قابل فلاح مصري قاله أنه لقى و هو بيحفر في الآرض آثار و برديات فراح التاجر النمساوي كلم صديقه بتاع الآثار و جه الراجل و شغل الرجالة و طلع ب 10 الالاف وثيقة تاريخية من الفيوم بس و خدهم و راح أهداهم لإمبراطور النمسا فراح الراجل مشكورا اداله أوضة من قصره (اللي مكانه زى قصر عابدين كده) و قاله إعملنا متحف يا عم. 


خرجت من المتحف ده و انا بقول : يا سلام .. دي الفيوم بس. داحنا عندنا مئات المدن اللي كل واحدة فيهم بتحكي قصة حضارات العالم كله في نفس المكان. 


سبنا متحف البرديات ده و دخلنا على متحف الحفريات. طبعا ده متحف كبيييير لأن العلماء كانوا بيتسابقوا مع بعض من شتى مدن العالم في عصر التنوير و ما بعده أنهم يلموا حفريات لأى حاجة من أى حتة و يشوفوا مين أقدم من مين و يكتشفوا مواد جديدة و معادن في الأرض جديدة ده طبعا حصل في وقت كنا أحنا لسة بنكتب على ورق و هما كانوا بدأوا الطباعة في القرن ال15 و احنا السلاطيين العثمانيين كانوا مانعين الطباعة في الدولة العثمانية (زى قطع الانترنت كده) لحد أول مطبعة وصلت مصر كان جايبها معاه "نابليون" الله يخيبه في القرن ال 17 يعني صباح الفل. (و هبقى أقولكم ليه الله يخيبه بعدين).

المهم مكانش في حاجة تذكر عن مصر في متحف الحفريات ده لأننا طبعا مالناش حاجة تذكر عالميا في تطور العلم من 400 سنة كده و كل شغلنا على التاريخ و المنظره الفارغة من غير ما نعمل بيه أى حاجة. و لو في حاجة اتعملت فعلا فأكيد ضاعت وسط التشويش المعلوماتي و نظام التعليم الفاشل و الغشومية و الارهاب الفكري اللي احنا عايشينه.

خرجنا من متحف الحفريات دخلنا أرشيف الحكومة النمساوية و فيه شفنا خرايط من 400 سنة و خطابات مع الدولة العثمانية و وثيقة تسليم الاتراك لمدينة بودا (اللي هي جزء من بودابست) و رحلات الامبراطور في العالم و الجو ده. طبعا ده الجزء المعروض بس لكن ارشيف الدولة ده مبنى طويل عريض في ملفات من الأرض للسقف و تستطيع أنت طبعا لقانون إتاحة المعلومات أنك تقدم طلب أنك تخش الارشيف و تاخد جولة (زى جوجل) كده و ده ممكن يفيدك لو انت باحث أو حتى بتحب التاريخ و عايز تتفسح.

من ضمن الحاجات اللي شفناها في الارشيف ده لما امبراطور النمسا جه حفل افتتاح قناة السويس و خطاب من الخيديوي اسماعيل و منيو الأكل في حفل الافتتاح الصبح للإمبراطور (بيض مسلوق ، اسبرسو ، بيتي بان بالجبنة .. حاجات كده) و بعدين لما الامبراطور حب يتغدى فودوه مطعم في الاسماعيلية تبع شركة قناة السويس (و برضه حاطين منيو الأكل) : كان في مايونيز .. كانوا بياكلوا مايونيز و الشعب ساعتها بياكل فول .. أه يا بلد. و صور من القناة و الحاجات اللي احنا عارفينها ديه.

بعد ما خرجت من المتاحف ديه جاتلي مجموعة  خواطر :

- مصر كنز حضاري بشري عابر للعصور. ماهو مش ممكن كل بلد اروحها في العالم فيها متحف يبقا فيها جناح للتاريخ المصري بس و احنا حالنا عامل كده. يا راجل ده و هما بيشرحوا نظرية تطور الإنسان من القرد (بعيدا عن كوني مقتنع بيها أو لأ) كان المصري تطور لإنسان و بدأ يكتب و لسة في بقايا أشباه بشر لسة ماتطوروش في أوروبا. 

- أحنا بنبص على تاريخ مصر و هويتها على أساس أن كل حضارة جت طمست اللي قبلها و فشخته ، بنتعامل كما لو أن اليونانيين شافوا الفراعنة هنود حمر .. و الرومانين شافوا اليونانيين في مصر هنود حمر .. بل بنتعامل على أن العرب و المسلمين لما فتحوا مصر تعاملوا على أساس ان المصريين اللي كانوا موجودين كانوا هنود حمر. لا مصر مش أمريكا .. المصريين اللي عايشين على الأرض ديه مانقرضوش مع كل الحضارات اللي عدت عليهم. الحقيقة أن الحضارة المصرية اتبنت على التراكمات مش على الإقصاء حتى لو الطبقة الحاكمة حاولت تعمل ده في فترات من التاريخ. أحنا بيوصل بينا التقزيم أننا بنشوف تاريخنا عناوين زى كتاب التاريخ الفاشل اللي بندرسه في ثانوي و اعدادي. بنشوف مصر : فراعنة - يونان - رومان - مسلمين - عمرو بن العاص - صلاح الدين - بيبرس - شجرة الدر (قباقيب) -  محمد علي - خديوي اسماعيل - الملك فؤاد - فاروق - ناصر - سادات - مبارك - ثورة - اخوان - سيسي. بكل سهولة كده بنختصر 7000 سنة في شوية عناوين و قوالب. 

- ليه بقول الله يخيبه نابليون .. لأن لو كان واحد عربي هو اللي اكتشف حجر رشيد ده كان الوضع بقى مختلف تماما .. طريقة تناولنا لتاريخنا للأسف مبنية على نظرة الآخرين في تناولهم لتاريخنا. في حين أن المسلمين (اللي جايين من جزيرة العرب) لما دخلوا مصر تناولوا التاريخ اليوناني و الحضارة اليونانية بالنقد و الدراسة و خدوا منها العلم اللي ينتفعوا بيه (بصوت اللمبي).
القوى الاستعمارية لما اهتمت بالفراعنة و ابو الهول و الجو ده خلق عند قطاع مننا نوع من العداء مع تاريخنا نفسه. الحروب الصليبية خلقت عندنا مشاكل في التعامل مع تاريخنا المسيحي. الصراع العربي الإسرائيلي خلق عندنا مشاكل في التعامل مع تاريخ اليهود في مصر. في حين أن سيدنا عيسي و سيدنا موسى عاشوا في مصر و في حين أنه حكاية الأديان الثلاثة جزء لا يتجزأ من حكاية الأرض اللي احنا عايشين عليها ديه و هي جزأ لا يتجزأ من إيماني كمسلم بالأنبياء دول و انا عايش على أرض مصر. 

أحنا بندرس التاريخ الجاهلي و الأدب الجاهلي (بتاع كفار قريش) اللي هو قبل عصر صدر الإسلام بتفاخر و بأهمية أكبر من اهتمامنا بدراسة الأدب القبطي أو اليوناني (كفار أثينا) المصري. ما بقولش ما ندرسش الأدب الجاهلي لأنه مقدمه أساسية في معرفة تاريخنا و مكوناته العربية اللي قبل ظهور الإسلام اللي كان بمثابة النور اللي أشع حضارة من المحيط للصين بتعاليمه و بقرآنه. لكن في نفس الوقت لازم أحنا - كمصريين - نفهم أننا هويتنا المصرية متعددة و شاملة. في دول كده ربنا سبحانه و تعالى أراد ليها أنها تكون مراكز حضارية في العالم عابرة للزمان و المكان .. و الحقيقة أني مش شايف أى تعارض بين كوني مسلم و ما بين الفكرة ديه. بالعكس!!

يعني انت عايز تقول أيه؟ يعني انت عايز تقول أن مصر مش اسلامية .. مصر مش عربية؟ يا عم لأ. 

مصر كنز أحنا لحد الآن بجهلنا بنحاول نطمسه ، بنخاف نفتحه ، بنخاف من نفسنا. الارهاب الفكري (بعيدا عن الصراعات السياسية و الدم اللي بيسيل بقاله 3 سنين و احتكار مفهوم الوطن و التكالب على السلطة) اللي احنا عايشين فيه ما بينا و ما بين بعض ده هو العائق الوحيد قدام أى تقدم لينا في أى مجال. 

أبويا كان يقوللي : ماتقفزش للنتيجة. و احنا الحقيقة مفيش حاجة بنعملها غير اننا " بنط " للنتيجة بناءا على معلومات ناقصة أو نظرة ضيقة أو اختصار استيعاب لآلاف السنين في بعض سطور كتب تاريخ مدرسية مكتوبة بشكل عقيم و بتعبر عن وجهة نظر الحزب الحاكم.

موسى نبي ، و عيسي نبي ، و محمد نبي .. و كل اللي ليه نبي يصلي عليه.
عليهم الصلاة و السلام أجمعين.
There was an error in this gadget